ИСПОВЕДАНИЕ СКИТСКОЕ

    Исповедаюся аз грешный имярек Господу Богу вседержителю и пресвятой его матере и тебе, моему отцю. Исповедаю матере и всем святым его вся согрешения, и вся злая моя дела, их же сотворих и помыслих и глаголах отнележе крещен есмь и да иже и до сего дне и часа. Сего ради своим рукописанием вся сия исповедаю всемогущему Богу и тебе, моему отцю, имущему власть простити ся. И ты, господине отче, Христа ради приими мя кающася и прости мя во всех моих согрешениих, их же ти ся каю, их же помню и их не помню, и множества ради срама моего. Сия суть греси мои пред Богом и пред тобою, господине отче. 

    Согреших: пытах и Отцы и Сыне и Святем Духе и сам глаголах разсужах, что есть Бог, и что есть бесплотнии небесныя силы, и о грому, и о молни, и о небеси, и о земли, и о всей твари Божии, и о честем создании, яже моима очима видимая и невидимая, о всем том своим безумием мудрствовах и глаголах не тако, яко же святии отцы писали. 

    Дерзах хулу на Господа Бога Отца и Сына и Святаго духа, и на пречистую Богородицю, на животворящии крест, и на вся сылы небесныя, и на аггелы, и на пророкы, и мученики, и святители, и на преподобныя отцы, тако же и на святыа и на женьския лики, и на вся святыа праздники, и на вся преставльшаяся от Адама и до сего дни. Все то осудих и похулих и прекослових о всем о том своим безумием. Похулих тварь Божию всю видимую и невидимую, и всяко здание Божие человеческаго естества. Осудих и поругався и посмеяхся мужеску возрасту и женьскому, и черноризцам и черноризицам, старым и юношам. 
Похулив образ Божии и пречистои Богородици, иже на иконах писана, и всех святых образы, и взирах на образы Божии, пречистои Богородици, и вся сия образы, и крестихся не крестоообразно, и поклонихся не по чину образом Божиим с поруганием, с мерзостию, с лицемерством, а не верою, с лукавством. 

    Похулив церковь Божию, олтарь, престол, сосуды святыя, тело Христово, дары, просвиры, евангелие, апостол, и вся книги божественыа, святых отец писани, собою исправливая и иных уча не по уставу. 

    Похулив и осудив священника служащаго божественную литургию, и вечерню, и заутреню, и всяко пение похулив, и осудих в пети клирошан, и пономаря, и всех предстоящих в церкви. Смутив священника в церкви, и клирошан, и пономаря, и всех предстоящих прогневах, а сам предстоях в церкви с великою мерзостию и с лукавъством злаа помышлях. А о церкви Божии и о пении и о молитве нерадих, и о церковном правиле небрегох, ни во что же вменях, и неверовав писанию, что писано о церкви Божии. Нечисто прихождах в ней, яко же в простую храмину, со всякою злобою. 

    Пытах о судбах Божиих и похулив судбы Божии, и разсужах о судбах Божиих своим неразумием, и злослових. 

    Преступих закон Божии якоже во святем евангелии писано: “Алчен бых - не накормисте мене, жаден - не напоисте мене, болен - не посетисте мене, в темници - не приидосте ко мне, наг - не одеясте мене, странен - не введосте мене. И вся заповеди Божия, евангельския и святых апостол, и святых отец седми соборов и с местнох соборов заповеди, - все то похулив, небрегох всему тому, пугахся своим неразумием. 

    Не веровах о воскресении мертва, о втором пришествии и о страшном суде, о будущей муце, о царствыи небеснем, и о муках. Все то лжа вменях, неверовах святому евангелию, и апостолу, и всему божественому писанию святых отец, еже нам на ползу писали и на спасение. Неверовах житием святых отец и преподобных, мученическим мучением како жили и мучни неверовах, како искони были и впредь будет. 

    Господине отче, пред Богом Иисус Христом и пречистою его Материю и пред святыми его аггелы и пророкы и мученикы, и святители и мученики, и святители и преподобными, и пред всем святыми много греших и безаконовах от начала и до кончины, от востока и до запада, от земля и до небеси. 

    Господине отче, душею моею и телом моим окаянным многи грехи, и всем созданием моим и всеми чювствы моими во блудных делех, в любодеянии, и мужложстве, и в деторастлении, и в рукоблудии, и в содомъском блужении, и в стегноблудие, и во всех блудных моих делех, согреших, прости мне, господине отче святыи, Христа ради прости во всем.